السلام عليكم
البوست هيكون طويل شوية وهتكلم فيه عن كذه حاجه مهمه في التدريب ف كوباية شاي "لو بتحبيه للاسف" وتعالي
___
_اهم حاجه في التدريب هو تحديد خطة تدريب معينة منظمة ومرتبة تدريجيا
احنا هنا بنتدرب على ايه؟ تحسين مهارات حل المشكلات وبعلي مستوى تفكيري
عشان الغرض ده يتم ويتم صح لازم اكون ماشية على خطة تدريب مرتبة من الابسط للاتقل بتعلي مستوايا بشكل تدريجي
عشان مستوايا يعلى مينفعش احل مسائل سهله بجيبها بسهوله
ومينفعش افضل احاول في مسائل تقيلة جدا حتى لو بجيبها بعد ايام
ده كده حل عشوائي
التدريب الصح هو اني امشي تدريجيا ، بشوف توبيكس مش اعلى من مستوايا اوي وابدأ اذاكرها واحل عليها واتدرب اني احلها اسرع لحد ما تبقى سهله بالنسبالي وابدأ اشوف اتقل منها اتدرب عليه وهكذا
كده انا مستوى تفكيري بيعلى وبيعلى صح وبشكل تدريجي عشان استفاد صح
في خطط تدريبية كتير جداا وده الجزء اللي هنتكلم فيه بعد كده
___
"كل الطرق تؤدي الى روما"
مينفعش افضل اتنقل في كذه خطة تدريب .. امشي في خطة شوية وبعدين اشوف غيرها وامشي شوية والاقي خطة تانيه وامشي فيها شوية
كده انتي اسمك ماشيه في خطط تدريب بس فعليا؟ انتي ماشية عشوائي بردو
كل خطط التدريب بتأدي نفس الغرض وتوصل لنفس المستوى .. نركز في خطة واحده بس ونكملها من اولها لاخرها وهنوصل بردو ان شاء الله
منشتتش نفسنا في كذه خطة .. ده بيضيع وقت ومجهود عالفاضي ومش بس كده .. النفسية بتبقى وحشة لانك شايفه انك عماله تحلي من كذه مكان بس انا مستوايا مبيعلاش .. مبيعلاش لانك مش مركزة في خطة واحده ومش ماشية تدريجي بشكل صح للاسف :"
وده جزء تاني هنتكلم فيه بردو
___
"انا بحل كتير جدا بس مستوايا ثابت"
من ضمن المشاكل اللي بتقابلنا في التدريب هي الجمله دي .. انا بحل بس مستوايا ثابت .. في كذه حاجه تخلي مستواكي ثابت على الرغم انك بتصحي كل يوم تحلي :"
_اول نقطه وهي اللي اتكلمنا عنها فوق .. التنقل في الخطط .. عماله اتنقل من خطة لخطة واحل من هنا شوية ومن هناك شوية .. اسمي بحل كل يوم .. لكن انا مش ماشية بشكل منظم بحيث ابقى كل يوم بحاول في مسائل اتقل من مستوايا فتفكيري يعلى واتدرب عالاتقل وهكذا .. ف انا اسمي بحل لكن مستوايا مش بيعلى
_طب انا مبتنقلش وماشية على خطة واحده فعلا مستوايا مبيعلاش ليه؟ .. في الخطط التدريبية في الاغلب بيكون في ماتريال لتوبيك معين وعليها شيت بياخد اسبوع على الاكثر .. من الحجات اللي متعليش مستواكي اني اذاكر ماتريال الاسبوع واحل كام مسألة مالشيت اللي عليها وبس .. مثلا لو الشيت فيه 26 مسألة ف انا بكتفي بحل 10 مسائل مثلا وبسكيب وبدخل عاللي بعده
دي من اسباب انك تلاقي انك ماشية في تدريب ثابت اهو بس مستوايا مبيعلاش بردو .. في كل شيت بيكون في مسائل standard ومسائل اتقل واصعب وفيها افكار .. اني احل السهل بس من الشيت ف انا كده حليت اللي بعرف اجيبه بس .. واحنا اتفقنا ان مستوايا هيعلى بايه؟ اني احل اللي اتقل من مستوايا .. ف انك تكتفي بالسهل بس او الstandard بس ف انتي كده معملتيش حاجه .. السهل ده بيتحط عشان تمشي ايدك في التوبيك الاول وبعد كده تشوفي الصعب واللي فيه افكار .. ف مينفعش اكتفي بالسهل بس وابقى كده خلاص عاوزة اي مسألة تيجي في التوبيك ده اعرف احلها .. لازم اخلص الشيت كله واحل على التوبيك من برا كمان وافضل احل عليه كتير من كذه مصدر عشان اتقنه كويس
_من اسباب ان مستواكي ميعلاش بردو ومبتبقيش عارفه ايه المشكلة هو طريقة تعاملك مع المسألة نفسها ، اتعامل مع المسألة ازاي؟
1_ ورقة وقلم دائما وأبدا .. مينفعش استغنى عنهم ولا افكر من غيرهم
2_ مرحلة القراءة
اقرأ المسألة كويس جدا واتأكد اني فهماها صح واطبق فهمي على الinput في المسألة واتأكد انه نفس الoutput .. اشوف الconstrains واكتب في الورق هتعامل معاها ازاي وايه نوع ال data type اللي هستخدمه
3_ مرحلة التفكير
ورقتي وقلمي وابدأ افكر في المسألة .. هو عاوز ايه؟ اقدر احقق ده ازاي؟ اشوف الافكار اللي هتيجي في بالي وامسك كل فكرة وافكر فيها واشوفها هتنفع ولا لا واحط تيستات عليها اشوف هتطلع مظبوطه ولا لا .. افكر في الcorner cases وهتظبط على فكرتي ولا مش هتنفع .. امسك كل فكرة اشوفها بالاسلوب ده لحد ما ارسى على فكرة معينه .. وابقى متأكدة ان الفكرة دي هتنفع وماشية صح ومظبوط  .. افكر في الtime واشوف فكرتي هتعدي مالتايم والميموري ولا مش هتنفع واحسب الtime complexity للكود اللي هكتبه للفكره دي واشوفه هينفع ولا محتاجة اشوف حاجه اسرع
4_ مرحلة كتابة كود
عالورق الاول بردو .. مش لازم نكتب الكود كله عالورق .. يكفي اني اكتب خطواتي هتمشي ازاي .. هعمل كذا كذا وهستخدم كذا .. ابدأ امسك اللاب واكتب الكود
5_ مرحلة السابميت
خلاص كتبت الكود وفكرت كويس وكله تمام اعمل سابميت بقا .. هيحصل حاجه من الاتنين ، يا اما لون اخضر جميل او لون ازرق وحسبي الله ونعم الوكيل 🫡
نتعامل ازاي ؟
طبعا في حالة الاخضر ف مسموح تقومي ترقصي عادي ويا الف نهار ابيض والف نهار مبروك 🫠
في حالة الازرق ؟ ندخل عالمرحلة اللي بعدها
6_ مرحلة الdebug
انا عندي كذه نوع من الازرق وكل نوع وليه تعامل معين
أ_ Run time
النوع ده هو اني بحاول امسك او استعمل حاجه مش موجودة
زي اني عندي اراي السايز بتاعها 500 وانا بقوله في سطر ما في الكود اطبعلي العنصر اللي في اندكس 600
ويحك؟ السايز اصلا 500 يعني انا اخر اندكس محجوز عندي هو 499 ..انا معنديش اندكس اسمه 600 اصلا .. بaccess حاجه مش موجوده
الموضوع ده بيحصل في كذه حاجه غير الاراي .. فيكتور مثلا فاضي ومش مدياله سايز واجي اقوله
cin>>vi
انا مش واخد سايز اصلا حضرتك ف انا معنديش اندكسيز لسه يعني ايه vi دي🥹
وفي مشاكل تانيه في حاجه اسمها الstls بردو اني اقوله هاتلي رقم من كذا وهو فاضي اصلا مفيهوش ارقام
وفي حاجه تانيه بردو وهو اني بعمل عمليات حسابيه وممكن يحصل اني اقسم عالصفر .. وطبعا احنا عارفين ان القسمه عالصفر قيمة غير معرفة 👀
كل ده ممكن يسبب نوع الرونج ده .. ف لما يحصل بتأكد ان مفيش حاجه زي كده بتحصل واحاول اسابميت الكود تاني
ب_ Time limit
الباشا الكبير .. في حالة الرونج دي ف انا كده كودي عدى التايم المسموح .. نفكر في حاجه من اتنين
يا اما الكود في تيست معين بيدخل في infinity loop ف انا محتاجة اهندل الجزئية دي
يا اما الكود اصلا مش هيعدي في التايم المسموح ف انا محتاجه افكر في طريقة اسرع .. وفي الحته دي انا كده محتاجة ارجع للورقة والقلم تاني .. ف نركن اللاب بقا ونرجع للورقة والقلم ونفكر من جديد
ج_ memory limit
الازرق اللي مش بنشوفه كتير
معنى كده ان كودي واخد ميموري اكبر من المسموحة في المسألة
ليها تفكيرين بردو
ممكن في تيست معين بيحصل مشكلة تخليني عماله اخزن والكود مش ماشي صح .. او حاجة زي الrecursion مثلا الbase case مش مظبوطة
ف بنشوف هل ده بيحصل ولا لا
والحاله التانيه ان ميموري المسألة عالحروركروك ف محتاجين نفكر في افضل طريقة تخلينا نستخدم اقل ميموري ممكنه 😤
وده اللي بنتدرب عليه انك تكتبي كود efficient في الميموري والتايم ! 👀
د_ Wrong answer
البعبع!
اول حاجه برجع للورقة والقلم .. افكر هل انا فكرتي صح اصلا؟ انا فاهمه المسألة صح؟ ايه التيست اللي ممكن يوقعها؟ اشوف corner cases و tests واشوف هل بتطلع صح فعلا ولا لا
احاول اشوف تيست يوقع الكود بتاعي واطلعه بنفسي .. ودي مهارة بنتدرب عليها بردو وهو انك تظبطي الكود ويبقى بيعدي في كل التيستات الممكنة .. من غير ما تشوفي تيستات معينه! :" وعشان كده التيستات في اغلب التدريبات بتكون مقفولة
لقيت تيست يوقع كودي اجري اعدله واسابميت؟ لا .. افكر تاني واشوف هل في تيست تاني يوقع ولا لا واتأكد من فكرتي تاني كويس .. واسابميت
في كل الازرق ده نفتكر كويس اننا مش داخلين في عركة مع المسألة😂
يعني مينفعش افضل اضرب 25 رونج وكل شوية يرونج واجيب تيست يوقع واجري اسابميت ويرونج تاني واسابميت تاني ليكون الموقع مش واخد باله ولا حاجه وهكذا والاقيه جايب تايم في الاخر او تطلع فكرتي غلط وهوبا الاقي اني ماشية غلط اصلا او مش فاهمه المسألة صح ف انا كده ضيعت وقت كبير جدا عالفاضي
لازم نركز في كل مرحلة وندي كل مرحله حقها كويس هتوفر علينا مجهود في المرحلة اللي بعدها .. مينفعش افكر دقيقتين واروح اكود الاقي اني عماله اظبط حجات واكتشف حجات غلط واني لا مش همشي كده ولا ده مينفعش وامسح واكتب واعيد وازيد
كل ده تضييع وقت
Think twice , code once
نفكر كويس جدااا واكود مره واحده بس .. مرحلة الكودينج والديباجينج مينفعش يبقى وقتهم اكبر من مرحلة التفكير ابدا
تفكير خمس دقايق زيادة هيوفر عليا نص ساعه ديباج واكتر كمان
الكلام ده يقعد قد ايه؟ من ساعه لساعتين
وده اللي هنتكلم فيه في النقطة الجاية
_ من اسباب انك تبقي بتحلي ومستواكي مبيعلاش بشكل كويس بردو هو التطويل في التفكير في المسألة
مينفعش اقعد في مسألة بالايام مش ماسكه غيرها .. اخرك في المسألة من ساعه لساعتين ساعتين ونص بالكتير اوي .. لو لسه في دماغك افكار ف ممكن تركنيها وتشوفي غيرها وتبقي ترجعيلها تاني لان احيانا الانسان بيعطل كده وتبقي عايزة تفصلي بحاجه تانيه وترجعي تاني .. لكن لو مفيش في دماغك افكار مينفعش تفضلي مسكاها بالايام كده .. بنبدأ نسأل بقا!
ودي النقطه اللي هنخووش فيها دلوقت اتقلي 🫣
_ الاسئلة
محدش بيتقدم من غير اسئلة! .. كلنا محتاجين نسأل وكلنا محتاجين نستفيد من اللي حوالينا
مينفعش امشي لوحدي واللي يقابلني معرفوش اسكيب وافضل مكملة لوحدي
الcommunities اتعملت عشان نساعد بعض ونكون في وسط ناس مهتمه بالموضوع ف نستفيد من خبرات بعض ونفيد بعض
مينفعش ابقى في وسط حاجه زي كده ومستغلهاش كويس جدا!
السؤال من اهم اسباب التقدم .. لازم اسأل ومحدش فينا مبيحتاجش يسأل ايا كان مستواه
ف اياكي تتكسفي من السؤال او اصل سؤالي تافه اصله سهل اصل انا غبية
مفيش كل ده :"
كلنا بنحتاج نسأل ومحدش اتولد عارف كل حاجه :"
كلنا هنا بنتعلم
نسأل ازاي؟
أ_ انا دلوقتي فكرت في المسألة كويس وجبت فكرة وتمام
في طريقين .. يا اما كتبت كود او مكتبتش
لو كتبت كود ف انا في الحالة دي جبت ازرق لاني هحتاج اسأل صحصحي معايا كده🫣
واتأكدت من فكرتي وكودي ومش عارفه اطلع تيست يوقعه ومش عارفه اعرف المشكلة فين
في الحالة دي بننزل بوست ونحط لينك المسألة ونرفع الكود اللي كتبناه على موقع اسمه ideone
هحط في اول كومنت لينك الموقع هتفتحيه وتحطي الكود في المكان المخصص ليه وتحددي اللغة من تحت ومتنسيش تدوسي run وتستني الصفحه تحمل بعد كده تاخدي لينك الصفحه دي وتحطيه في البوست مع لينك المسألة
ونشوف بقا حد يقولنا المشكلة فين :"
طب لو مكتبتش كود وموصلتش لفكرة؟
فكرت من ساعة لساعتين وموصلتش لفكرة اعمل ايه؟
نطلب hint
طرف خيط .. حد يديني طرف خيط ادخل منه للمسألة .. بدل مانا بفكر في كذه حاجه هو يديني بداية ادخل منها وافكر فيها .. بناخد الhint وتبدأي تفكري فيه بنفس المراحل من جديد .. مده كويسة بردو .. موصلناش؟ ناخد hint تاني وتالت ورابع .. لحد ما خلاص انا مش عارفه اوصل للفكره
نطلب فكرة المسألة بقا
انا مش عارفه اجيب الفكرة خالص وفكرت كتير .. انزل بوست حد بقا يقولي فكرة المسألة عالطول
اعرف فكرة المسألة واشوف هي جت كده ازاي وصح ليه وافهمها كويس جدا
بس كده؟ لا انا كده عرفت الفكرة وخلصنا من مرحلة التفكير ندخل في الكودينج بقا!
ابدأ اكودها بايدي واكتبها بنفسي واجيبها اكسيبتدد
لو كتبت ومظبطتش؟ ابدأ اتعامل مع الازرق زي ما قولنا فوق ولو موصلتش انزل حد يقولي مشكلته
طب لو معرفتش اظبطه خالص؟
اطلب كود الحل بقا
بس كده؟ لا اخد الكود وافهمه كويس واحاول اكتبه بايدي بردو واجيبه اكسيبتدد
في كل المراحل دي انا بحاول انا اللي اوصل للحل .. طريقة التعامل دي مع المسألة هي اللي هتظبط اداءك وتخليكي تستفيدي مالمسألة اقصى استفادة ان شاء الله
مينفعش استسهل معرفة الحل عالطول ابدا
ودي النقطة اللي هنتكلم فيها بعد كده
بس قبل ما نتكلم فيها .. بعد ما بننزل بوست بسؤالنا مبننامش جنبه 🌚 .. بننزله ونشوف غيرها لحد ما حد يرد .. مينفعش افضل مستنية لان ده تضييع وقت بردو
_ من الاسباب بردو اللي تخليكي بتحلي بس مستواكي مبيعلاش ومش حاسه بتقدم هو اني افكر كويس وموصلش ف اجري اشوف الحلول او التوتوريالز
ف انتي قدام نفسك بتفكري وبتحلي كل يوم بس الدنيا مش مظبوطه بردو!!
مينفعش اجري عالحلول عالطول واشوف التوتوريالز عالطول
الحجات دي متاحه لو معرفتش اسأل او مفيش حد يفيدني ب hint او اي مساعده
لكن مينفعش تكون هي الخطوة اللي بعد التفكير عالطول
انا كده مبفكرش كويس ومبديش المسألة حقها .. لازم افكر كويس واطلب هينتس وافكر تاني وتالت واحاول اجيبها انا وحتى لو خلاص هنتس بعرف الفكرة واحاول اكتبها انا بردو .. لكن الاستسهال بيبوظ الدنيا ومش هتلاقي مستواكي بيظبط :"
_ من النقط اللي بتضيع وقت بردو هو طريقة كتابتي للكود
انا ممكن اكون ظابطه كل اللي فات ده بس طريقة كتابتي للكود مبوظة الدنيا
بكتب اكواد طويلة جداا ممكن تتبسط في كام سطر
الحل لحاجه زي كده هو اني اشوف اكواد كتير
بعد ما احل المسألة ابدأ اشوف حلول الناس واركز عالحلول البسيطة وافهمها كويس .. الموضوع ده هيعلمك ازاي تبسطي كودك وهيخلي تفكيرك يتظبط في حته كتابة الكود ومره في مره هتلاقي ان اكوادك بقت بسيطة وبتتقرئ بسهولة وده هيفيدك جداا في مرحلة الديباج وهيوفر عليكي وقت كبيرر
___
نيجي لاهم نقطة بقا :"
الاستعجال
من اسوأ الحجات اللي بتبوظ كل حاجه!
مفيش حد بيطلع مره واحده .. كل العمالقة اللي انتي شيفاهم وبتقارني نفسك بيهم دول كانوا كتاكيت زيك عادي :"
محدش اتولد عارف كل حاجه وشاطر في كل شئ
حتى الموهوبين .. الموهبة لوحدها متعملش حاجه .. لازم الممارسة والمذاكرة
مينفعش استعجل النتايج ولا ابقى لسه بادئة النهارده وعايزة ابقى ماستر بكره الصبح :"
كل حاجه بتيجي بالتدريب ومره في مره وتدريجي
منستعجلش النتايج ومره في مره كل حاجه هتظبط ان شاء الله وهتلاقي انك بتتقدمي :")
___
_ الرحلة فردية!
مش هقولك احنا لوحدنا في هذه الدنيا وكلهم عابرون ووااء😫
لان ده مش حقيقي
ممكن يكون معاكي ناس بتشجعك وتدعمك عادي جدا وده شئ محبب للنفس ويا سلام لو موجود! :"
لكن مينفعش ابقى دايما مستنية ده يحصل
مينفعش اوقف اي شئ عاوزة اعمله بان اصل مفيش حد يشجعني او مفيش حد يمشي معايا او مفيش حد يدعمني
احنا جايين الدنيا هنا نعمل اللي علينا ونقوم بواجباتنا .. مينفعش ابقى دايما مستنية حد يقف عالراسي يقولي اعمل ايه ومعملش ايه :"
لازم اتعود اظبط نفسي بنفسي واساعد واساند نفسي وامشي مع نفسي
مش دايما هتلاقي اللي يشجعك ولا دايما هتلاقي ناس ماشية معاكي
موجودين؟ خير وبركة
ماشيين في طريقنا بنحاول وبنعافر وبنجيب اخرنا واخر اخرنا ونسأل ونتعامل ونساعد ونتعرف على ناس يشجعونا ونشجعهم لكن مقفش مكاني مستنية اللي يزقني :"
في كل مرحله هتقابلي حد يشجعك
انا كإسراء في البداية كان معايا ناس معينه بنشجع بعض وبنساعد بعض .. مره في مره اللي بطلت واللي مستواها علي جامد ما شاء الله واللي وقفت معرفتش تكمل .. وانا ماشية لقيت ناس تانيه واتعرفت عليهم وشجعنا بعض بردو وفي منهم اللي بطلوا بردو وقابلت ناس تانيه وهكذا
هي دي الدنيا :"
اتعرفي على ناس في المجال وشجعوا بعض .. بطلوا او مبقوش موجودين؟ كملي زي مانتي وهتقابلي غيرهم وهكذا
متوقفيش تدريبك على حد او توقفي حياتك عامة على حد
شدي حيلك وافعلي ما يتوجب عليك فعله :")
___
_في نقطة الاسئلة محتاجين نتكلم في حاجه بردو وهي اعتمادنا على شخص بعينه
مينفعش كل ما احتاج سؤال يبقى عندي شخص واحد بس عماله اسأله
اول حاجه ده تضييع لوقته لان مش انتي لوحدك اللي بتسألي ممكن يكون في غيرك بردو .. ف تخيلي انه يرد على كل دول ؟
تاني حاجه انه ممكن ميعرفش يفيدك ف هتقفي!
وعشان كده الجروبات موجودة ونعمة عظيمة انك تكوني في وسط اللي مهتمين باللي انتي مهتمه بيه
ف عندك الجروبات مخصصه للاسئلة وكله بيجاوب وبيساعد من غير ما نبقى عاملين ضغط على ناس بعينها
وزي ماقولنا مفيش كسوف مالسؤال
ولو يعني خلاص مش عارفه تتصرفي في الكسوف ف عندك انك تسألي كمتخفي اعتقد هيبقى اريح
واعتقد بردو وجود جروب للبنات بس بقا اريح كتير في النقطة دي ووفر علينا كتير! :"
ف استغلوا الموضوع ده ومتستهونوش بالاسئلة ابدا
___
الشغف!
الشغف كلمه عايمة جدا وبتضيع كتير :"
واعتقد فيديو دكتور مصطفى هيساعد في الموضوع ده افضل ما اتكلم عنه
هسيبه في اول كومنت اسمعوه هيفيدكم..
___
_كده احنا اتكلمنا في التدريب
ده كده تدريب الproblem solving وازاي احسن مستوايا فيه وبعض المشاكل وحلها
في بقا حاجه مهمه مبناخدش بالنا منها
في فرق بين ان مستوايا يكون كويس في الps وبين اني اكون كويسة في الcp
الcp او الcompititive programming هو اني ادخل بمهاراتي في الps دي جوا مسابقة !
وده لوحده ليه تدريب اضافي
انا اه بعرف احل مسائل معينه بس هل انا بعرف احلها في وقت معين ؟
دي النقطة
هو اني اتدرب على التفكير والحل بسرعه
ممكن يكون مستواكي في الps عالي بس بتدخلي كونتستس مبتعرفيش تظبطي الدنيا وبتخرجي مش حاله كل اللي المفروض تحليه
الجزء ده محتاج حاجتين
_ندخل مسابقات كتير سواء فيرشوال او في وقتها ونتدرب على الحل والتفكير بسرعه وازاي اتعامل جوا الكونتست واخد السهل الاول وبعدين اشوف الصعب ومفضلش في مسألة واحده وقت كبير واقسم وقت الكونتست على المسائل وافكر في كله ومينفعش الكونتست تخلص وانا مخدتش فكرة عن كل المسائل او فكرت فيهم كلهم
لازم اظبط الموضوع ده عشان اقدر اظبط اداءي في الكونتستس
وادخل كونتستس كتير بالتوازي مع تدريبي العادي
_ الupsolve
مستوايا في الكونتست بيعلى بالابسولف
اني ادخل كونتست احل اللي اعرف احله والكونتست تخلص واروح لحال سبيلي كده انا مستفدتش حاجه مالكونتست
لازم upsolve
يعني ايه؟
يعني احاول في المسائل الباقيه
انا كنت في كونتست 14 مسالة وجبت 5 في الكونتست
بعد الكونتست ما تخلص ابدأ افكر في المسائل الباقية واحاول فيهم بنفس الاسلوب اللي قولناه فوق
مره في مره بدل ما بتجيبي 5 من 14 عدد اللي بتجيبيه هيعلى ومستواكي في الكونتست هيتحسن
من غير ابسولف مستواكي مش هيتحسن كويس في الكونتستس وهتبقي بتدخلي عالفاضي ومبتستفاديش
___
المقارنة بالغير :"
اسوأ شئ ممكن يحصل في طريقك
كل واحد ليه امكانياته وقدراته وحياته وكلنا مختلفين عن بعض
مينفعش انا بظروفي وامكانياتي وقدراتي اقارن نفسي بحد تاني الله اعلم وضعه ايه !
لا اقارن نفسي بحد اعلى مني ولا اقل مني
الاعلى مني هيضعف ثقتي بنفسي والاقل مني هيديني غرور كاذب :"
بنركز مع نفسنا وبس وانا مستوايا بقا فين مقارنة بالشهر اللي فات ؟
هي دي المقارنة الصح واللي تظبط مستواكي فعلا وتعليكي
____
وفي النهاية نفتكر دايما ان لكل مجتهد نصيب وعلى قدر اهل العزم؟ تأتي العزائم إن شاء الله♥️
متيأسوش وشدوا حيلكم وهاتوا اخركم وربنا يوفقنا جميعا ان شاء الله♥️
اشعر اني مقولتش كل اللي في بالي ف ممكن ابقى اعدل عليه لو افتكرت شئ وهثبته بردو ان شاء الله .. وجود لاق